( عامِلّي بلّوك )
وبعد الحظر ما إتبدّل خلاص وإتفك
لاقيته في ثانية من تاني عامِلّي بلّوك
لا أنا فاهم ولا عارف ليه إتغيّر
باقيت والله من أفعالُه متحيّر
وخلاني في نفسي بجد بدأت أشُّك
ما أنا مش هفضل أتحمّل ولا ادادي
وأشوف قلبي بيتبهدِل وأعيش راضي
ويتحمّل بدال الكلمة مِية كلمة
وأشوفك وإنت بتوّجه لُه التهمة
وبتنَصّب كمان نفسك عليه قاضي
أنا مش لعبة تلعب كل يوم بيها
ولمّا منها راح تزهق في أبعد حتة ترميها
أكيد فيه مشاعر الإهمال بيقتِلها
ومشاعر ثابتة صعب في يوم نبدّلها
ومشاعر تانية أقل كلمة تحييها
أنا القلب اللي قولت عليه ده لسه خام
ولمّا أخدتُّه ليك تمليك دفعتلُه كام
أنا القلب اللي أصبحلك هِبه ببلاش
ولمّا قلبك إستغنى فِضل جانبك وماستغناش
نتيجتُه ضريبتُه يدفعها بعاد وخصام
ياريت من تاني تتراجع أو تفكّر
وكل قرار بتاخده أكيد ده بيأثر
على العشرة اللي لسه في قلبي بقيالك
فحاول يعني تتحكم في أفعالك
لأن لكل فعل رَد أكيد أكبر
بقلمي عبدالحميد وهبه
No comments:
Post a Comment