( إتنين تانيين )
إيه اللي إتغيّر جوانا ماحناش عارفين
عايشين مع بعض أكيد لكن ماحناش عايشين
لا باقينا نكلّم بعضينا ولا حتى بنسأل
وكإنِنا فجأة إتحوِلنا لإتنين تانيين
عايشين مع بعض بنتعامل زي الأغراب
ولحُب العمر وعِشرتنا ما عملنا حساب
وقفلنا بيبان الشوق بينّا ولا عاد فيه عِتاب
ده العمر إن ولّى راح منّا هنجيبه منين
إيه اللي إتغيّر جوانا ماحناش عارفين
راح فين الحب اللي جمَعنا راح فين ما تقول
وأنا وإنت إزاي يعني وصلنا لطريق مقفول
لمّا إنت تقوللي ماهوش ذنبك وأنا نفس الحال
طب مين إتسبّب في بعادنا ومين المسئول
حاسين وكأنّا كده وصلنا للحارة السد
اللي مافيش حد أكيد فيها بيكلّم حد
كل ما بنحاول نتقرّب نبعد عن بعض
وكلامنا اللي بيجمع بينا بقى كله روتين
إيه اللي إتغيّر جوانا ماحناش عارفين
عايشين مع بعض أكيد لكن ماحناش عايشين
بقلمي عبدالحميد وهبه
25/2/2024
No comments:
Post a Comment