مسافر جوه نفسي
______________
باسافر كل يوم جِوّايا ميت مرة
واشوف الجنة بعيونى
وياما حاجات باشوفها حلوه من برّه
وياما عيونى خانونى
واشوف النار بأحوالها
وناس يكفيك ضنى حالها
وألملم بعضى من روحى
وألملم روحى من دوامة الأموات
واشوف فى الثانية ميت ساعة
من الظلمات
وناس عايشه فى بحبوحه
وناس م الضنك قلبها مات
وناس عايشه بأحزانها
وناس تلعب تلات ورقات
وناس من كتر أموالها
بتلعب بيها كوتشينه
وناس لعب الزمن بيها
وقَلّبها شمال ويمين
لا عاشت يومها بالتيله
ولا اَمنت تعيشها يومين
واعيش جوايا مش عارف
أعيش ميت ومش داري
وأعيش ما باشوفش وباداري
وفوق بؤئى سبع اقفال
وقدامى ميتين قناص
وضرب رصاص
وعايش عيشة البلاص
بيملونى هوى ظنونى
ويوم ورا يوم يفضونى
وانا مِتعَّبى ميت حاجه
حاجات مش منى وايه يعنى
ساعات تفرح
سنين بالقهر توجعنى
بقيت راديو وتليفزيون
وبرنامج مهوش لونى
وتخلص تانى يعيدونى
يفضونى من المضمون
ساعات بأفضل كتير فاضي
ساعات منفوخ على الفاضي
ساعات بانطق بألف لسان
واسيب نفسي بدون ماادري
كأنى خرجت من كادري
واعيش الحوجة والحرمان
زمن عريان
زمن بهتان
زمن اخرس
زمن ضعفان
زمن حواليه ميتين فصله
والف علامة استفهام
ودا كله يهز الكون واركانى
ويربط قفل فى لسانى
واكسر قفله بسنانى
واحطم سطوة السجان
وأرجع تانى من روحى
اسير الحاوجة والأحزان
وأعيد الحلم من تانى
فى يوم تانى
وياما اتحطم الوجدان
شعر
عبد الرحيم علىلا
No comments:
Post a Comment