دكتورة
دَخَلت عيادتها شفتها وزاد التعب
انهدّ حيلي عرقت وشكلي انقلب
قلبي المريض رجَف وشغلو اضطرب
وصارت هيي تفحص وتدور عالسببْ
***
مسكَت سماعة حططتها تحت نحري
وطلبتْ مني اتنفس وعبي هوا بصدري
تنفَست وعطرها بدمي صار يسري
وصار قلبي متل حمّص ع طبل انضربْ
***
قالت قول آاااه وطول بالحكي
رديت آااه وبلشت عيني البكي
تطلعت فيي وواضح انها ملبكي
وبعيونها حيرة ونظرة عجبْ
***
قالت معقول عم تبكي من الوجع
ولّا غناج على مرتك وحبة دلع
فَحَصت ضغطك وقلبك ع السمع
كلو تمام ومافي بجسمك عطبْ
***
صرت عنّ والصدر معبا قهر
يا دكتورة لما شفتك من شهر
من يومها قلبي وقع بأسر
وصرت ادعي لرب البشر
امرض ويكون عندي عذر
زورك والحمد لله تحَقَق الطلبْ
محمد حبيب يونس
No comments:
Post a Comment