قصيدة زجلية من ديواني الشعري*اللغز الكبير*
🛑 اللغز الكبير 🛑
************
توضحت الأمور
وبان التفسير
الكلام على الفساد أكثر
الهضرة وصلت لناس الدوار
اللي خلاها على الدار
مسؤول وأكبر شفار
فرق الوزيعة مع سياسيين أشرار
المال العام تهرب خارج الدار
طال الزمان ولا اقصار
الحق يبان
وتريب حيوط بنادم الغدار
وتبان شلا أسرار
وهذاك الشفار
مابقى ينفعو بخور في المجمر
🛑🛑🛑
إيوا دير الخير
ورجع مال الغير
وشوف فينا
لا تعطينا بالظهر
باركة من الغدر
راه الدنيا مادوم
خاف من دعوة المظلوم
راه منين يتقاضى لَعمر
الموت يجرك
ولو تتخبى في القصر
راه القبر فيه اشبر
🗣️🗣️🗣️
انا غير مجدوب الحرف
كنهضر ونعبر
بغيت حالنا يتغير
الإنسان عيا ما يصبر
نصيحتي ليك
تفادى الشر
قبل ما الوضع يتفجر
افهم المعنى
هذا لغز كبير
تجبد من قاع البير
فكر مزيان ورجع مال الغير.
مجدوب الحرف : محمد بلشقر
No comments:
Post a Comment